0
حه‌ماسه‌ و خۆڕاگری کانی چه‌رمو بەشی
Tuesday, 19 November 2013 10:04
حه‌ماسه‌ و خۆڕاگری کانی چه‌رمو بەشی
 
له‌ سه‌رماوەزی ساڵی١٣٦٢ی هه‌تاوی له‌ ئاوایی کانیچه‌رمو سه‌ربه ناوچه‌ی هه‌وشار له‌ نیوان پێشمه‌رگه‌کانی کۆمه‌ڵه‌ له گوردانی چیای دیواندەر و

هه‌زاران که‌س له هێزەکانی رژیم شه‌ڕێک رویدا، له‌م شه‌ڕەدا حه‌ماسه‌یه‌کی بێ وێنه‌ تۆمارکرا، ڕۆژێک هێرشی دوژمن و رۆژێک خۆڕاگری پێشمه‌رگه‌ی کۆمه‌ڵه‌، ئاوایی کانیچه‌رموی کردە مه‌یدانی ململانێیه‌کی بێ وێنه‌، له‌م ململانێیه‌دا هێزی زۆر و زەبەندی دوژمن دڕندەیی و زەبر و زەنگی خۆی نیشان ئه‌دا و پێشمه‌رگه‌ی کۆمه‌ڵه‌یش باوەڕی پته‌و خۆڕاگری و فیداکاری، ‌باقر شکوهی یه‌کێک له پێشمه‌رگه‌کانی کۆمه‌ڵه‌ که ئه‌وکات له گوردانی چیای دیواندەرە سه‌رقاڵی به‌ڕێوە بردنی ئه‌رکه‌کانی شۆڕش بوو له‌و خۆڕاگرییه‌دا به‌شدار بوە، کاک‌باقر باسی رووداوەکه‌ی بۆ گێڕاومه‌ته‌وە و منیش دەقاو دەق وەک خۆی نوسیومه‌ته‌وە.

 

گوردانی چیا یه‌کێک له‌گوردانه‌کانی کۆمه‌ڵه‌ بوو، ئه‌م گوردانه‌ له‌ناوچه‌ی دیواندەرە به ‌فه‌رماندەیی هاوڕێ قادر بارامی چالاکیمان ئه‌نواند، رۆژێک له ‌درێژەی چالاکییه‌کانماندا به‌رەو تیکاب وەرێکه‌وتین، پاش چه‌ند رۆژ له ناوچه‌ی که‌رەفتوو له‌نزیک ئاواییه‌ک که ئێسته ناوەکه‌یم له بیر نه‌ماوە ته‌نیا ئه‌وەندە ئه‌زانم که‌ له ‌به‌رانبه‌ر کێوی پێنج خوشکه‌ بوو ماینه‌وە، ماوەیه‌ک بوو رژیم به‌ته‌واوی هێزەوە سه‌رقاڵی هێرش بۆ هه‌مو ناوچه‌کانی کوردستان به‌مه‌به‌ستی داگیرکردنه‌وەیان بوو، ئه‌وکاتیش ئێمه‌ پاش هه‌ندێک چالاکی پێشمه‌رگانه و شه‌ر و تێکهه‌ڵچوون له‌گه‌ڵ هێزەکانی رژیم به‌رەو ناوچه‌ی تیکاب وەڕیکه‌و تین، به‌ردەوام له‌گه‌ڵ هێزەکانی رژیم له‌ حاڵی شه‌ڕ و تێکهه‌ڵچوندابوین و هێزەکانی رژیم پاش هه‌ر زەبرێک که لێیان ئه‌درا به‌ردەوام به‌ هێزێکی زۆرترەوە وەدوامان ئه‌که‌وتن.

له‌ به‌رانبه‌ر کێوی پێنج خوشکه‌ ئاواییه‌ک هه‌ڵکه‌وتوە، ڕێکه‌وتی٤ی سه‌رماوەز له‌نزیک ئه‌و ئاواییه‌دا ماینه‌وە به‌ڵکو ئه‌و رۆژە پشویه‌ک بدەین و شه‌و به‌رەو شوێنی مه‌به‌ستمان وەرێکه‌وین، هێزەکانی رژیم ئه‌و رۆژە هاتنه‌ ناوچه‌که‌و پاش ئه‌وەی له‌ بوونی ئێمه‌ له‌و ناوچه‌یه‌ ئاگادار بوون شوێنی نیشته‌ جێبوونی ئێمه‌یان دایه‌ به‌ر هێرشی تۆپه‌ دوور هاوێژه‌کانیان، تۆپارانێکی توند و بێ ئه‌مان بۆ ماوەی چه‌ند کاتژمێر به‌ سه‌رمانه‌وە به‌ردەوام بوو، هاوڕێ قادر بارامی بڕیاریدا که‌ ناوچه‌که‌ چۆڵ بکه‌ین و به‌رەو شوێنێکیتر وەرێکه‌وین. له‌ کاتی ڕۆیشتنمان به داخه‌وە یه‌کێک له هاوڕێیانی پێشمه‌رگه‌ که عه‌رەب زمان بوو به‌ر پریشکی تۆپی دوژمن که‌وت و به‌داخه‌وە پاش هه‌مو هه‌وڵه‌کانی هاوڕێیانی به‌شی پزیشکی به‌هۆی کاری بوونی برینه‌که‌ی گیانیبه‌ختکرد.

دوو شه‌و دوای گیانبه‌ختکردنی ئه‌و هاوڕێیه‌مان واته‌ شه‌وی٦له‌سه‌ر٧ی سه‌رماوەز کاتژمێر یه‌کی نیوەشه‌و گه‌یشتینه‌ ئاوایی کانیچه‌رموو. به‌نیاز بوین له‌وێ پشویه‌ک بدەین و به‌یانی کانیچه‌رمو به‌جێ بێڵین، هاوکات هێزێکی حیزبی دیموکرات له ئاواییه‌کی نزیک کانی چه‌رموودا بوو، ئێمه‌و هێزەکه‌ی دیموکرات پێکه‌وە پێوەندیمان هه‌بو، هه‌م ئێمه‌و هه‌م دیمو کرات ئه‌مانزانی که‌ هێزێکی زۆری ڕژیم له‌ناوچه‌که‌دان، بۆیه‌ هه‌رکات له‌ نزیک یه‌ک بوینایه‌ت هه‌ندێک گه‌ڵاڵه‌ی هاوبه‌شمان دائه‌نا و بۆ به‌رگری له هێرشی هێزەکانی رژیم به‌رنامه‌ی هاوکاریمان پێکه‌وە هه‌بوو، دو کێوی زۆر ستراتیژیک له‌ ناوچه‌که‌دا هه‌بون که زاڵ بوون به‌ سه‌ر ناوچه‌که‌دا و هه‌روەها زۆر به‌ ئاسانی له‌وێوە ئه‌کرا کانیچه‌رمو و ئه‌و ئاواییه‌ی که هێزەکانی دیموکراتی تێدا بوو کۆنتڕۆڵ بکرێت و له‌وێشه‌وە ئه‌کرا به ئاسانی هه‌مو هێرشێک به‌ر په‌رچ بدرێته‌وە، له‌ نیوان ئێمه‌ و هێزەکانی دیموکراتدا بڕیاردرا که‌ ئێمه‌ له‌ یه‌کێک له‌و کێوانه‌ و ئه‌وانیش له‌و کێوەکه‌یتر شه‌و که‌مین دابنێین و هه‌رکێوێکیان ژمارەیه‌ک پێشمه‌رگه‌ی بۆ بنێرین که تاکاتی مانه‌وەمان له‌و ناوچه‌یه‌ له‌ شوێنی دامه‌زراودا بمێننه‌وە، تا له‌ ئه‌گه‌ری هاتنی هێزی دوژمن بۆ ناوچه‌که‌ بتوانین به‌رپه‌رچیان به‌دەینه‌وە و به‌رەنگاریان ببینه‌وە، بۆ ئه‌و مه‌به‌سته‌ هاوڕێ قادر بارامی که ئه‌ندامی کۆمیته‌ی ناوچه‌ی دیواندەرە و هه‌ر وەها فه‌رماندەی نیزامی گوردانی چیا بوو واحدێکی له‌ هاوڕێیانی پێشمه‌رگه‌ی کۆمه‌ڵه‌ بۆ ئه‌و کێوەی وا بۆ کۆمه‌ڵه‌ دیاریکرابوو به‌ڕێکرد، ئه‌وەلای هێزەکه‌مان له‌ ئاواییدا ماینه‌وە، هه‌روەها سێ که‌‌س له‌ پێشمه‌رگه‌کانی دیموکرات که ئه‌یانویست بڕۆنه‌وە بۆ لای هێزەکه‌ی خۆیان لای ئێمه‌ مانه‌وە، ناوی که‌سێکیانم به ناوی ئیرەج تورک لەبیر ماوە، ئیرەج له‌وکاته‌دا به‌رپرسی به‌شی ته‌قینه‌وە (انفجارات)ی حیزبی دیموکرات له‌و ناوچه‌یه‌ بوو.

له‌بیرمه‌ له‌ به‌رئه‌وەی کاتێک چوینه‌ ناو ئاوایی کانیچه‌رمو درەنگ وەخت بوو هه‌رچه‌ند زۆرمان سه‌رمابو و زۆریش ماندو و برسی بوین، به‌ڵام هاوڕێ قادر بارامی بڕیاریدا که خه‌ڵک خه‌به‌ر نه‌که‌ینه‌وە وا باشترە برۆینه مزگه‌وت، با موزاحمی خه‌ڵک نه‌بین، ئێمه‌یش چوینه مزگه‌وت و به‌ هیوای ئه‌وەی که کێو و گردەکانی دەور و به‌رمان، هێزەکانی خۆمان و دیموکراتی تێداییه‌ به ئارامی و دڵی ئاسوودەوە سه‌رمان نایه‌وە و له دەوروبه‌ری ئاواییش که‌مینێکمان به‌ڕەواڵی هه‌میشه‌یی دانا بۆ دڵنیایی زیاتر و وریایی زۆرترمان. کانیچه‌رمو ئه‌وکات زیاتر له‌ سه‌دماڵ دانیشتوی له‌ خۆ گرتبوو، دەورو ‌به‌ری کانیچه‌رموو هه‌ندێک شیو و دۆڵ و گرد و که‌ژ و کێوی لێیه‌، ناوچه‌که‌ دارستانی نییه‌ و هه‌مو دەشتو دەر و که‌ژو کیوی رووته‌مه‌نییه‌.

له‌ ناو مزگه‌وت بوین، هه‌ر یه‌که‌و له‌سوچ و پاڵێکدا ڕاکشاین و له به‌ر دەرکی مزگه‌وتیش که‌سمان وەک پاسه‌وان(نگابان) دانا، ئه‌و که‌سانه‌ی که‌ وەک نگابان و که‌مین له‌دەرەوەی ئاوایی دانران بڕیار بوو زو زو بیان گۆڕین که‌ ئه‌وانیش بتوانن بێنه‌وە لانیکه‌م خۆیان له‌ ناو مزگه‌وته‌که‌دا له چنگ سه‌رما ڕزگار بکه‌ن، به‌دەم سه‌رما و له‌رزی پاییزی و سکی برسییه‌وە خه‌ومان لێکه‌وت، به‌ڕاستی پێشینیان جوانیان وتوە ئه‌گه‌ر خه‌وت بێت سه‌رینت ناوێ، به‌هه‌رحاڵ ماندویه‌تی رێگا و هه‌ڵات هه‌ڵاتی تێکهه‌ڵچونه‌کانی پێشوترمان و گه‌رمای ناو مزگه‌وت وای لێکردین له‌ سه‌ر سه‌رینی چه‌کو ڕەختمان به‌ خێرایی خه‌ومان لێبکه‌وێت، کاتژمێر٤ی سه‌رله‌ به‌یانی(نیوەشه‌و)بوو، ماندویه‌تی له‌شمان هێشتا دەر نه‌چوبوو، له‌ گه‌رمه‌ی خه‌ودا بوین،‌ به‌دەم دەنگی ته‌قه‌وە وەخه‌به‌ر هاتین، خێرا خۆمان کۆ کردەوە، سه‌رەتا شڵه‌ژاین، ئاخۆ ئه‌و ته‌قه‌ چی بێت؟

به‌ خێرایی هاوڕێ قادر بارامی خۆی گه‌یاند به‌ نگابان و که‌مینه‌کان، زانیمان هێزێکی زۆری رژیم هێرشیان هێناوە بۆ سه‌ر ناوچه‌که‌، دەرەتانێکمان بۆ نه‌مایه‌وە، کاک قادر هه‌مو واحدەکانی دابه‌شکرد به‌ دەور ئاواییدا که له‌ هه‌مو قۆڵێکه‌وە ئامادەی به‌رەنگاری و به‌ر په‌رچ دانه‌وەی هێرشی دوژمن بن، له‌ دوو قۆڵه‌وە شه‌ڕ به‌ توندی دەستی پێکرد. تا ئه‌وکات ئاوایی له بێدەنگیه‌کی ئاسایی خۆیدا بوو، به‌ڵام به‌دەستپێکردنی‌ شه‌ڕ هه‌مو بێدەنگییه‌که‌‌ شکا، به‌چه‌شنێک قیژە و گریان و شین و زەمه‌ڕۆی خه‌ڵکی ئاوایی و دەنگی ته‌قه‌ی دوژمن و ئێمه‌ تێکه‌ڵ به‌یه‌ک ببون و ئاسمانی کانیچه‌رمویان ته‌نی بوو، هێزێکی زۆری کاولکار و داگیرکه‌ر به‌ هه‌مو جۆر چه‌کێکه‌وە هه‌مو که‌سیان له‌ئاوایی کردبوە ئامانجی هێرشه‌که‌یان و هێزی پێشمه‌رگه‌ی ماندو و برسی به‌ڵام به‌ باوەڕ، به‌ که‌مترین ئیمکاناته‌وە به‌رگریمان له خۆمان و ئاوایی و ناوچه‌که‌ ئه‌كرد و له‌ هه‌وڵی تێکشکاندن و پاشه‌کشه‌کردن به هێزی داگیرکه‌ر و دوور خستنه‌وەیان له‌ ناوچه‌که ‌بوین، له‌ لایه‌کیترەوە خه‌ڵکی بێ که‌رەسه‌ی بێدەرەتان به‌دەم قیژە و گریان و شین و زەمه‌ڕۆی ژن و پیاو و منداڵ و گه‌نج و پیره‌وە له‌ هه‌وڵی خۆشاردنه‌وەی خۆیان و ماڵ و منداڵیان له‌به‌ر که‌وتنی گوله‌ و پریشکی ئاگری ئه‌و هێڕشه ماڵوێرانکه‌رەدا بوون‌.

قوتابخانه‌که‌ی ئاوایی ئاخرین ماڵ بوو که‌ له‌ نزیک دۆڵێکدا هه‌ڵکه‌وتبوو، ئه‌و دۆڵه‌ رێگای پێشرەوی هێزەکانی رژیم بۆ ناو ئاوایی بوو که دواتر بوە مه‌یدانی ئه‌سڵی شه‌ر و تێکهه‌ڵچونه‌که‌، هه‌روەک پێشتر باسمکرد شه‌و هاوڕێیانی خۆمان له‌ پاڵ ئاوایی که‌مینێکیان دانابوو، له‌و که‌مینه‌دا ژمارەیه‌ک له‌ هێزەکانی رژیم له‌ که‌مین که‌وتن و به‌دانی ته‌ڵه‌فاتێکی زۆر بڕێک پاشه‌کشه‌یان کرد، فه‌رماندەی گوردان له‌ دەستپێکی شه‌ڕەکه‌دا هه‌مو واحدەکانی دابه‌شکرد بوو که کام واحد کام شوێن بگرن، من له‌گه‌ڵ ئه‌و واحدە بووم که نزیک مه‌درەسه‌که‌مان پێسپێردرابوو، تا ڕووناکی هه‌وا چه‌ندین جار هێزەکانی رژیم هه‌ر هێرشیان ئه‌هێناو ئێمه‌ش تێکمان ئه‌شکاندەوە، ئیتر هه‌وا رووناک بوەوە ئه‌و جار ئێمه‌ ئه‌مانتوانی به‌جوانی هێزەکانی رژیم ببینین، ژمارە و ماشینه‌کانیان هێندە زۆر بوو که‌نه‌ک هه‌ر بۆمان نه ‌ئه‌ژمێردران به‌ڵکو بۆیشمان مه‌زەندە نه‌ئه‌كران.

به‌ رووناک داهاتنی هه‌وا هێرش و به‌رگرییه‌کان چڕتر بوونه‌وە، ئێمه‌و دوژمن به‌ جوانی یه‌كترینمان ئه‌بینی، شه‌ڕ له‌ دەور ئاواییه‌وە له دوقۆڵه‌وە به‌ توندی به‌ردەوام بوو، دوژمن هه‌ڕ هێرشی ئه‌هێنا و ئێمه‌یش هه‌رجارە تێکمان ئه‌شکاندەوە، ئه‌و دەسته‌یه‌ له پێشمه‌رگه‌کانی خۆمان که‌ شه‌و به‌ڕێکرابوون تا ئه‌و کێوەی بۆ کۆمه‌ڵه‌ دیاریکرابوو به‌دەسته‌وە بگرن، له‌ لایه‌ن هێزەکانی رژیمه‌وە گه‌مارۆ دران، رژیم هێرشی کرد که‌ سه‌ر ئه‌و کێوە بگرێت، به‌ڵام له‌گه‌ڵ خۆڕاگرییه‌کی بێوێنه‌ی ئه‌و هاوڕێیانه‌ به‌رەو ڕو بوو. شه‌ر له‌‌و کێوە به‌توندی به‌ردەوام بوو، دوژمن هه‌ر هێرشی ئه‌برد بۆ ئه‌وکێوە و هه‌رجارە به دانی ژمارەیه‌ک کوژراو بریندارەوە پاشه‌کشه‌یان ئه‌کردەوە رووبه‌دوا. له‌و ئاواییه‌ی وا دیموکراتی لێبوو دەنگی ته‌قه‌ نه‌ ئه‌هات، ئه‌مه‌ به‌و مانا بوو که هێزەکانی رژیم ڕەنگه‌ هه‌مویان به‌رەو کانیچه‌رمو هاتبن، به‌ڵام جێگای سه‌رسوڕمان له‌وەدا بوو ئه‌و کێوەیش که بڕیار بوو هێزەکانی دیموکراتی تێیدا جێگرببن دەنگی هیچ جۆرە ته‌قه‌یه‌ک نه‌ ته‌نیا نه‌ ئه‌هات به‌ڵکو هیچ جۆرە جمو جو ڵێکیشی له‌ سه‌ر نه‌ئه‌بیندرا، ئه‌گه‌ر بۆ ئه‌و کێوەی که بڕیار بوو هێزەکانی دیموکراتی تێدا بێت هێرشێک ئه‌نجام بدرایه‌ت هێزەکانی رژیم به‌ دڵنیاییه‌وە به‌دانی ته‌ڵه‌فا تێکی یه‌کجار زۆرەوە ناچار ئه‌بوون پاشه‌کشه‌ بکه‌ن.

شه‌ر تا نزیک نیوەڕۆ له دەور ئاوایی و ئه‌وکێوە وا هاوڕێیانی ئێمه‌ی لێیدامه‌زرابوون به‌توندی به‌ردەوام بوو، جیاواز له‌ ته‌قه‌ی چه‌کی وەک کڵاش و ژ٣ و تیربار و ئارپیجی، هێزەکانی رژیم شوێنه‌کانی ئێمه‌و ناو ئاوایشیان به‌ توندی دابوە به‌ر هێرشی هه‌موو جۆر خومپارە و تۆپێک. ئێمه‌ له‌ ئاواییدا گه‌مارۆ درابوین، واته‌ دەور ئاوایی به‌ته‌واوی به‌ هێز و ماشینی دوژمن ته‌ندرابوو، جیاواز له‌ ناو ئاوایی ته‌نیا شوێنێک که‌ به‌دەستمانه‌وە بوو ئه‌و کێوە بو وا بە دەست هاوڕێیانی خۆمانه‌وە بوو. کاتێک هێزەکانی رژیم له‌ گرتنی ئه‌و کێوە ناهومێد بوون ئیتر وازیان له‌ هێرش بۆ سه‌ر کێوەکه‌ هێنا، نزیکه‌و نیوەرۆ هێزێکی زۆری رژیم به‌بێ هیچ جۆرەگرفت و به‌رەنگارییه‌ک به‌ چه‌کی قورس وەک تۆپی١٠٦ خۆیان گه‌یاندە سه‌ر ئه‌و کێوە وا به هێزەکانی دیموکرات سپێردرابوو. تا ئه‌وکاته‌ گه‌رچی هێرشی هێزەکانی رژیم بۆ سه‌ر ئێمه‌ به‌ توندی به‌‌ردەوام بوو، به‌ڵام هێرشه‌کانیان به‌ربه‌ست کرابو و هه‌رجارە به‌دانی ژمارەیه‌کی زۆر کوژراو بریندار پاشه‌کشه‌یان پێکرابوەوە، دروسته‌ دوژمن هێرشی هێنابوو و ئێمه له‌ناو گه‌مارۆدا بوین، به‌ڵام له‌ راستیدا ئه‌وە ئه‌وان بوون تا ئه‌گرا توشی شکست و زەرەر و کوژراو بریندار هاتبوون و هێرشیان به‌ربه‌ست کرا بوو. ئێمه‌ خۆمان ئه‌مانتوانی ئاوایی بپارێزین و به‌رەنگاری دوژمن ببینه‌وە، چون له‌ سه‌ر کێوەکانه‌وە مه‌ترسییه‌ک بۆ سه‌ر ئێمه‌ هه‌ست پێنه‌ ئه‌کرا، دوکێو بو زۆر ستراتیژیک بوون له باری نیزامییه‌وە که له‌وێڕاوە ئه‌توانرا هێرش بکرێت و پشتیوانی هێرش به‌ران دابین بکرێت و ناوچه‌که‌ خرێته‌ ژێر کونترۆڵ و زال بوو به‌سه‌ر ناوچه‌که‌دا، ئه‌و دوکێوە بوو که یه‌کیان هاوڕێیانی خۆمانی تێدا بوو ئه‌وی تریشیان بۆ دیموکرات دانرابوو ئه‌وان له‌وێ بن، شه‌ر به‌گه‌رمی له دەور ئاوایی به‌ردەوام بو، ئه‌توانم بڵێم هاوڕێ قادر بارامی فه‌رماندەی گوردان له‌و ماوەیه‌دا ته‌نانه‌ت چرکه‌ ساتێکیش له‌ شوێنێکدا نه‌وەستا، به‌ردەوام پێوەندی به‌ واحدە کانه‌وە ئه‌گرت، به‌سه‌ر سه‌نگه‌رەکانی هاوڕێیاندا ئه‌گه‌ڕا، ئه‌توانم بڵێم تاقه‌ سه‌نگه‌رێکی پێشمه‌رگه‌ نه‌بوە که ئه‌و رۆژه‌ هاوڕێ قادر بارامی چه‌ندجار سه‌ردانی نه‌کردبێت، کاتێک روی تێئه‌کردین و خۆی له‌ ناو جه‌رگه‌ی شه‌رەکه‌دا به‌ردەوام به‌ناو هاوڕێیاندا ئه‌گه‌ڕا ورەیه‌کی تایبه‌تیتری به‌ هه‌مومان ئه‌دا. فه‌رماندەیی شه‌رەکه‌ی ئه‌کرد، به‌ردەوام دوژمنی ئه‌خسته ژێر کۆنتڕۆڵ و چاوەدێرییه‌وە، بڕیاری پێشڕەوی و پاشه‌کشه‌ و به‌ڕێوە بردنی تاکتیکه‌کانی جه‌نگی ئه‌دا و له‌ ژێر لێزمه‌ی تۆپ و خومپارە و کاتیۆشا و هه‌مو جۆر چه‌کێکیتردا سه‌نگه‌راو سه‌نگه‌ری ئه‌کرد و زۆر جارانیش خۆی ڕاسته‌و خۆ له‌ سه‌نگه‌رەکانی هاوڕێیانه‌وە دائه‌نیشت و به‌چه‌که‌که‌ی به‌رەنگاری هێرشی دوژمن ئه‌بوەوە.

تا ئێرە جگه‌ له‌ تێکشکاندن و زەرەربه‌دان له‌ دوژمن، هێزەکانی رژیم سه‌رکه‌وتنێکیان به‌ نسیب نه‌ببو، ئێمه‌ لای مه‌درەسه‌که‌ چه‌ندین که‌ڕەت هێرشی گه‌ورەی دوژمنمان تێک شکاندبوو، هه‌رجار که هێزەکانی رژیم له‌م قۆڵه‌وە هێرشیان ئه‌هێنا ژمارەیان چه‌ند سه‌د که‌س ئه‌بو، به‌ڵام به‌ خۆراگرییه‌کی بێ وێنه‌ تێکمان ئه‌شکاندنه‌وە و ئه‌وانیش پاش ئه‌وەی ژمارەیه‌کی زۆریان لێئه‌کوژراو بریندار ئه‌بون پاشه‌کشه‌یان ئه‌کردەوە دوا، تا نیوەڕۆ هێرشی دوژمن و تێکشکاندنیان هه‌ر به‌ر دەوام بوو. هێزەکانی رژیمیش له تۆپباران کردنی ناو ئاوایی به‌توندی به‌ردەوام بوون، چه‌ندکه‌س له هاوڕێیان پێکه‌وە به‌نیاز بوین خۆمان بگه‌یه‌نینه‌ کۆڵانێک، له‌و کاته‌یشدا سێ که‌سه‌که‌ی دیموکرات که لامان مابونه‌وە له نزیک ئه‌و کۆڵانه ‌بوون، کاتێک بۆ ئه‌وێ رێکه‌وتین هاوکات چه‌ند گوله‌ تۆپ له‌و لاترمانه‌ ته‌قینه‌وە، له‌گه‌ڵ دەنگی ته‌قینه‌وەکه‌ یه‌کێک له هاوڕێیانمان له‌خۆوە هاواری کرد یا غه‌وز، یه‌کێک له‌ حیزبییه‌کان که ناوی ئیرەج بوو به دوو دەست کێشای به‌سه‌ر خۆیدا و وتی باوکه‌ڕۆ ئه‌م کۆمه‌ڵانه‌ که مارکسیستن له‌به‌ر توندی تۆپبارانه‌که‌ په‌نا ئه‌به‌نه‌ به‌ر غه‌وز ئاخۆ ئێمه چی بکه‌ین، به‌ خوا تیا ئه‌چین و دەرچونمان مه‌حاڵ ئه‌بێت، ئه‌و دیمه‌نه‌ی هاوڕێکه‌ی خۆمان و کاک ئیرەج هێندە پێکه‌نینی بوو که شه‌ڕ و ته‌قه‌ی بۆ چه‌ند چرکه ساتێک له‌بیر بردینه‌وە و دەستمان کردە پێکه‌نین.

شه‌ڕ له‌چه‌ند لاوە به‌توندی هه‌ر به‌ردەوام بوو، رۆژ له‌ نیوەڕۆدا بوو، هێزەکانی رژیم که‌ له‌ هێرش بۆ ئه‌وگردە وا هاوڕێیانی ئێمه‌ی لێجێگیر ببون هه‌ر وەها له هاتنیان بۆ ناو ئاوایی ناهۆمێد ببون دەستیان دابوه‌ پێشڕەوی به‌رەو ئه‌و کێوەی وا دیاریکرابوو هێزەکانی دیموکراتی تێدا بێت، ئه‌و کێوە زاڵ بوو به‌سه‌ر هه‌مو ناوچه‌که‌دا و هه‌مو شوێنێک له‌ ژێر کۆنترۆڵ و چاوەدێریدا بوو، ئه‌و هێرشه‌ی رژیم لای ئێمه‌ زۆر گرینگ نه‌بوو چون به‌ پێی رێککه‌وتن ئه‌و کێوە هێزەکانی حیزبی دیموکراتی لێبو و ئه‌مانزانی ئه‌وان هێرشی ئه‌و هێزە تێک ئه‌شکێنن و جاش و پاسدارەکان دەست له‌ژنۆ درێژتر پاشه‌کشه‌ ئه‌که‌ن. ئێمه‌ هه‌ر سه‌رقاڵی شه‌ر بوین و خومپارەباران و تۆپبارانی ئاوایی و هێرشی هێزەکانی رژیم بۆ لای قوتابخانه‌که‌ هه‌ر به‌ردەوام بوو، له‌مکاته‌دا که‌سێک خه‌ڵکی ئاوایی له‌ناو دێدا که‌وته‌ به‌ر پریشکی گوله‌ تۆپ و به‌داخه‌وە هه‌ر له‌ویا گیانیبه ‌ختکرد.

لانیکه‌م شه‌و رۆژێک ئه‌بو که‌ نان و چا و ئاومان نه‌خواردبوەوە، به‌ڵام به‌و ‌دۆخه‌یشه‌وە ئاگر و هێرشی دوژمن هێندە قایم و به‌ردەوام بوو که نه‌مانه‌په‌رژا مێشکمان به‌ ماندویه‌تی و برسێتی و تونیه‌تییه‌وە سه‌رقاڵ که‌ین، ئه‌وەی بیرمان لێئه‌کردەوە خۆڕاگری بوو و ڕاونانی دوژمن و دوور که‌وتنه‌وەی خۆمان له‌ ناوچه‌که‌بوو. ژمارەیه‌کی زۆر له‌ هێزەکانی رژیم که‌ دەستیان دابوە پێشڕەوی بۆ سه‌ر ئه‌و کێوەی وا دیموکراتی پێوە بوو، زۆر چاوەڕوان نه‌کراو بینیمان به‌ بێته‌قه‌ و بێکێشه‌ خۆیان گه‌یاندە سه‌ر کێوەکه‌ و پاش جێگیر بونی خۆیان ته‌نانه‌ت تۆپێکیشیان بردە سه‌ر کێوەکه‌، ئه‌و جارە له‌وێه‌وە دەستیان دایه‌ تۆپبارانی ئه‌و گردەی وا هاوڕێیانی ئێمه‌ی لێ جێگیر بوون، به‌داخه‌وە ئاگادار کراین هێزەکانی دیموکرات نه‌چوبونه‌ سه‌ر ئه‌وکێوە نازانم بە چ هۆکارێک نیوە شه‌و ناوچه‌که‌یشیان به‌جێهێشتبوو، ئێمه‌ به‌ هیوای ئه‌وەی که ئه‌و کێوە به‌دەست دیموکراته‌وەیه‌ که‌سمان بۆ نه‌نارد و وەک قه‌ڵایه‌ک پاڵمان دابو پێوەی به‌ڵام به‌داخه‌وە زانیمان قه‌ڵاکه‌ی پشتمان به بنکۆڵی به‌سه‌رمانه‌وە به‌جێ هێڵدراوە، تازە دۆخێکی چاوەروان نه‌کراو هاتبوە پێش، ئه‌وجار هه‌مو هیواکانمان و به‌رنامه‌کانمان تێکچوو، به‌ هه‌رحاڵ دوژمن ئه‌و کێوەی گرتو و زاڵبو به‌سه‌ر ناوچه‌که‌دا، ئه‌وکات دەستیدایه‌ هێرشێکی بێوێنه‌ی هه‌مه‌لایه‌نه‌.

هه‌رچی بۆ ناو ئاوایی هێرشیان ئه‌هێنایه‌وە تێک ئه‌شکێندران، جاشه‌کان به‌توندی له‌ سه‌ر کێوە به‌رزەکه‌وە دەستیان دایه‌ تۆپبارانی ئه‌و گردە وا هاوڕێیانی ئێمه‌ی لێجێگیر بون، به‌داخه‌وە یه‌کێک له‌ هاوڕێیان له‌ سه‌ر ئه‌و گردە گیانیبه‌ختکرد. سه‌رەڕای ئه‌وە هێرش بۆ سه‌ر ئاوایی به‌ردەوام بوو هاوکات هێزەکانی رژیم هێرشیان بۆ سه‌ر ئه‌و گردە وا هاوڕێیا نی ئێمه‌ی تێدا بوو توندتر کردەوە، ئیتر هاوڕێیانی ئێمه توانای خۆڕاگری زیاتریان نه‌ما، به‌ناچار دەستیان دایه‌ پاشه‌کشه‌ به‌رەو ناو ئاوایی. دوانیوەڕۆ ئیتر هه‌مو هێزەکانمان له‌ ناو ئاواییدا بوین، دوژمن خۆی یه‌ک چاو کردبوەوە، رژیم ئه‌و هێزانه‌ی وا داینابوو ئه‌و که‌ژە له‌چنگ هاوڕێیان بسێننه‌وە و له‌گه‌ڵ ژمارەیه‌کی زۆرتری هێزەکانیان هێنایه‌ ئه‌و دۆڵه‌ وا به‌رەو لای مه‌درەسه‌که‌ ئه‌هات، ئیتر لای مه‌درەسه‌که‌ بوە مه‌یدانێکی هه‌رە گرینگی شه‌ر و له‌م قۆڵه‌ی ئێمه‌‌وە زۆر به‌توندی هێرشیان هێنایه‌ سه‌رئاوایی و شه‌ڕێکی سه‌ختمان به ‌سه‌ردا سه‌پا و ئێمه‌یش دەستمان دایه‌ به‌رگرییه‌کی سه‌رو ماڵی، هێزەکانی رژیم هاتنه‌ چه‌ند میتریمان، به‌چه‌شنێک که ئیتر بوە شه‌ڕە نارنجۆک، ناو ئاوایی له‌ لایه‌ن هێزەکانی رژیمه‌وە به‌ردەوام له‌ ژێر ئاگری تۆپ و خومپارەکانی دوژمندا بوو که بێڕەحمانه‌ و به‌ بێ دەست پارێزی ناو دێیان تۆپباران ئه‌کرد.

فیشه‌ک و ته‌قه‌مه‌نیمان رووبه ته‌واو بوون ئه‌ڕۆیشت، رۆژگار هێشتا زۆری مابوو، ئێمه‌یش خه‌ریک بوو توانای خۆراگریمان که‌م ئه‌بوەوە، هێرشی هێزەکانی رژیم ئیتر به‌ هێرشه‌وە نه‌وەستا، به‌ڵکو دەستیان دایه‌ گه‌مارۆدانمان، ئێمه‌یش که‌وتبوینه‌ دۆخێکه‌وە که رێگای دەرباز بونیشمان ئاسته‌م بوو، دەور و بەری ئاوایی به‌ته‌واوی گیرابوو، ژمارە و ماشینی هێزەکانی دوژمن هێندە زۆر بوون که بۆمان به‌راورد نهدە‌کرا، هێزی دوژمن زۆر و تێر و تۆخ و چه‌ک و ته‌قه‌مه‌نی زۆر و که‌رەسه‌ی زۆر له‌ به‌ردەستیاندا و ئێمه‌یش ماندو، برسی، تونی، بێ سه‌رپه‌نا و بێ که‌رەسه‌ و ته‌نیا که‌رەسه‌ی به‌رگری له‌ خۆمان فیشه‌ک و چه‌ک و چۆڵ و نارنجۆکه‌کانمان بوو که ئه‌ویش وردە وردە رووبه‌ ته‌واو بوون ئه‌ڕۆیشت. هه‌مو ناو ئاوایی له ژێر ئاگری تۆپه‌کانی دوژمندا بوو، ئاڵقه‌ی گه‌مارۆ له‌ دەور ئاوایی توندتر کرایه‌وە، په‌یتا په‌یتا هێزی تازە نه‌فه‌س لای مه‌درسه‌که‌ی ئاواییه‌وە به‌رەو ئاوایی هێرشیان ئه‌هێنایه‌وە، هه‌رجارە پاش شه‌ڕێکی توند به‌رەنگاریان ئه‌بوینه‌وە به‌ڵام جاری دواتر که‌ هێرشیان ئه‌هێنایه‌وە سەدان که‌س به‌یه‌کجار رووبه‌ ئێمه‌ ئه‌هاتن، له‌م نێوانه‌دا دوو که‌سیتر له‌ هاوڕێیان گیانیانبه‌ختکرد، هێزەکانی دوژمن به‌ته‌واوی زۆریان بۆ هێناین، هاوڕێ قادر بارامی به‌ردەوام به‌سه‌ر هاوڕێیاندا ئه‌گه‌ڕا و له ناو ئاوایدا سه‌ردانی سه‌نگه‌ری هاوڕێیانی ئه‌کرد و هه‌مو قۆڵه‌کانی شه‌ڕ ئه‌گه‌ڕا، کاتژمێر چواری دوانیوەڕۆ بو کاک قادر له کاتی سه‌ردان له‌ سه‌نگه‌ری هاوڕێیان به‌داخه‌وە که‌وته‌ به‌ر گوله‌ی داگیرکه‌ران و گیانیبه‌ختکرد. گیانبه‌ختکردنی هاوڕێ قادر زۆر کاریگه‌ری بو له سه‌ر ورەمان، ئێمه‌ تێکۆشاین هه‌واڵی گیانبه‌ختکردنی هاوڕێ قادر بشارینه‌وە که ورەی هێزەکه‌مان نه‌روخێت، به‌و جۆرە به‌شی هه‌رە زۆری هاوڕێیان تا کاتی هاتنه‌دەرەوەمان له ئاوایی نه‌یانزانی که کاک قادر گیانیبه‌ختکردوە، گوردانێک له‌ناو ئاڵقه‌ی گه‌مارۆدا به‌ هێز و ته‌قه‌مه‌نییه‌کی که‌مه‌وە بێ فه‌رماندە که‌وتین.

هێرشه‌کانی رژیم به‌ردەوامتر و چڕتربوونه‌وە، هێزەکانی رژیم له‌ هه‌ندێک شوێنه‌وە توانیان دزە بکه‌نه‌ ناو ئاوایی که ئه‌وە بارو دۆخه‌که‌ی ته‌واو له‌ ئێمه دژوارتر کرد، خه‌ڵکی ئاوایش که له کاتی دەستپێکی شه‌ڕەکه‌وە خۆیان له‌ ژێرخان و گه‌وڕ و زاغه‌کانیاندا شاردبوەوە هه‌ر به‌و وەزعه‌وە‌ مابوونه‌وە، چه‌ندە مه‌ترسی گیانی له‌ سه‌ر ئێمه‌ بوو چه‌ند هێندە له‌سه‌ر خه‌ڵکی ئاوایی، ئه‌وان بێدەرەتان هه‌رکامه‌ و له‌ شوێنێک که ‌وەک گیانپه‌نا ته‌نیا خۆیان تیا حه‌شار دابوو مابوونه‌وە به‌و هیوایه‌ به‌ڵکو به‌ر پریشکی تۆپ و خومپارە نه‌که‌ون و گیانی خۆیان و ماڵ ومنداڵیان له ‌گوله‌ی وێڵ به‌دوور بێت، مه‌ڕ و ماڵاتی ئاوایش هه‌ر وەک هه‌موان له‌و گه‌مارۆیه‌دا گیریان کردبوو. سیمای ئاوایی زۆر خۆفناک بوو، سه‌دان جاش و پاسدار له‌لایه‌که‌وە هێرشیان ئه‌کرد بۆ کوشتنی ئێمه‌، هه‌ر جارە دەیان که‌سیان لێ ئه‌کوژرا تا هێرشه‌که‌یان به‌ربه‌ست یان تۆزێک پاشه‌کشه‌یان پێئه‌کرا دواتر، دەنگی ڕەقی ته‌قه‌ی فیشه‌ک، زرمه‌ و ناڵه‌ی نارنجۆکی دەستی و ئارپیجی، ویژەی گوله‌ تۆپ و خومارە و ورمه‌ی ته‌قینه‌وەیان، شیوەن و زەمه‌ڕۆی خه‌ڵکێکی بێدەرەتان و گیر خواردو له‌ ماڵه‌کانیاندا، ته‌پ و تۆز و دوکه‌ڵی به‌رزبوەوە له‌ ئاکامی ته‌قینه‌وەکان، روخانی دیواری ماڵان، خوێن و جه‌نازە و کوژراو بریندار دیمه‌نگه‌لی ئه‌و رۆژەی ئاوایی کانیچه‌رموو بوون.

خۆر خه‌ریک بوو ئیتر خۆی بۆ ماڵ ئاوایی کردن له‌و رۆژه‌ ئامادە ئه‌کرد و مه‌یدانی روناکی دونیا بداته‌ دەست مانگ و ئه‌ستێرەکان، هه‌وا وردە وردە به‌رەو سێبه‌ر و تاریکداهاتن و ئێوارە ئه‌رۆ یشت، بڕیاردرا که‌ فکرێک بۆ دەرباز بوونمان بکه‌ین و رێگایه‌ک بۆ چونه‌ دەرەوەمان له‌ ئاوایی بدۆزینه‌وە، به‌‌ڵام له‌کوێیوە ئه‌مانتوانی دەربازبین، چوار دەوری ئاوایی به هێزێکی یه‌کجار زۆر ته‌ندرابوو، هێزەکانی دوژمن به دەیان ماشینی پڕ له هێز و ته‌یار به‌ چه‌کی وەک دۆشکا، کالی په‌نجا و تیربارەوە دەور ئاواییان گرتبوو، ئێمه‌یش تا ئه‌وکاته‌ چوار هاوڕێمان گیانیانبه‌ختکردبوو، شه‌ڕیش هه‌ر به‌گه‌رمی به‌ردەوام بوو، فیشه‌کمان ئیتر به‌ته‌واوی هاتبوە کزی، خۆیشمان ماندو و بێ هێز ببوین، هێزەکانی رژیم به‌ردەوام بوون له‌ هێرشه‌که‌یان، به‌هه‌مو جۆر چه‌کێک ته‌قه‌یان لێ ئه‌کردین ئێمه‌یش ئه‌بوا له‌ ته‌قه‌‌ی زیاوە خۆمان بپاراستایه‌ت و دەستمان به‌فیشه‌ک و ته‌قه‌مه‌نیمانه‌وە بگرتایه‌ت، له‌م هێرشه‌ تازەیه‌یانه‌دا یه‌کێکیتر له‌ هاوڕێیان به‌ر گوله‌ی ئارپیجی که‌وت، به‌ توندی بریندار ببو، هاوڕێیانی پزشیکار به‌و که‌مه ئیمکاناته‌وە به‌دەمیه‌وە بوون، بریندارەکه‌یشمان ڕاگرت که‌ دواتر کاتی پاشه‌کشه‌ به‌ڵکو بتوانین له‌ئاوایی بیهێنینه‌ دەر، به‌داخه‌وە ئه‌ویش گیانیبەختکرد، توندی شه‌ڕەکه ‌و هێرش و پێشڕەوی دوژمن بۆ ناو ئاوایی زیاتر ببو، ئه‌وجار له بڕێک شوێنی ئاواییه‌وە شه‌ر که‌وتبوە ناو کۆڵانه‌کانی ئاوایی، ئیتر هه‌وا تاریک داهاتبوو، دەسته‌یه‌ک له هاوڕێیان له ژێر ئاگری تۆپ و چه‌ک و چۆڵی دوژمندا ته‌رمی هه‌ر پێنج هاوڕێکه‌یان به‌شیوەیه‌کی هاکه‌زایی شاردەوە که به‌ڵکو نه‌که‌وێته‌ دەست دوژمن و بتوانین رۆژی دواتر خۆمان یان دۆستانی کۆمه‌ڵه‌ی بۆ بنێرین و بیان گوێزنه‌وە. ئه‌و دەسته‌ ته‌واو بوون له‌ شاردنه‌وەی ته‌رمه‌کان.

زۆربه‌ی هاوڕێیان له‌ لا خواروی ئاوایی کۆبوونه‌وە که به‌ڵکو بتوانین له‌وێوە له ئاوایی بڕۆینه‌دەر، ئێمه‌ هێشتا لای مه‌درەسه‌که‌ که که‌وتبوە لاسه‌روی ئاوایی مابوینه‌وە و هه‌ر خه‌ریکی شه‌ڕ و به‌ر په‌رچدانه‌وەی هێرشی جاش و پاسدارەکان بوین، به‌رانبه‌ر ئاوایی واته‌ ئه‌و شوێنه‌ی وا به‌نیاز بوین لێوەی دەرباز ببین دەشتاییه‌ک بوو که‌ هیچ جۆرە دارو درەختێکی تیا نه‌بوو، دەشتێکی رووت و قوت.

شه‌و که‌ دونیا تاریک داهات هاوڕێیانی ئێمه‌ به‌نیازی پاشه‌کشه‌ و دەرباز بوون له‌ ئاوایی سه‌نگه‌رەکانیان وردە وردە چۆڵ کرد و له داوێن ئاوایی کۆببونه‌وە، هێزەکانی رژیم که زانیان ئاگری ته‌قه‌ی هاوڕێیانی ئێمه بۆ سه‌ریان که‌م بوەته‌وە و ڕەنگه به‌نیازی ڕۆیشتنه‌دەر بین له ئاوایی، ماشینه‌کانیان کۆکردەوە هه‌مویان رووبه‌و دەشتاییه‌ وەستابوون، هه‌وا تاریکی کردبوو ئێمه‌یش لای مه‌درەسه‌که‌مان چۆڵ کرد و خۆمان گه‌یاندەوە به‌هاوڕێیان، هێزەکانی دوژمن وەک ئه‌وەی بزانن ئێمه‌ له‌و دەشته‌وە دەرباز ئه‌بین چرای ماشینه‌کانیان ڕۆشن کردبوو و روی چراکانیان روو به‌و دەشته‌ گرتبوو که شه‌وقی چرای ماشینه‌کان ئه‌و دەشته‌ی وەک رۆژی رووناک لێکردبوو، ئێمه‌ رێگایه‌کمان بۆ نه‌مابوەوە، به‌رەو دوا و لایه‌کانیتری ئاوایی نه‌مانه‌توانی بڕۆین، ئیتر ته‌قه‌مه‌نییه‌کیشمان پێنه‌مابوو، به‌شێکمان هه‌ر تاقه‌ یه‌ک فیشه‌کیشمان پێ نه‌مابوو، بۆیه‌ به‌ناچار ئه‌و دەشتاییه‌مان گرته‌به‌ر و به‌ شه‌ڕ و ته‌قه‌ له‌ ژێر گوله‌ بارانی دوژمندا له‌ ئاوایی چوینه‌ دەر.

وتمان ئه‌بێت بڕۆین و هه‌رئه‌م شه‌و له جادەی دیواندەرە بۆ سه‌قز بکه‌ینه‌ ئه‌وبه‌ر، ئه‌گه‌ر بێتو بمێنینه‌وە ئه‌گه‌ری ئه‌وە هه‌یه‌ به‌یانی بمان دۆزنه‌وە و هه‌مدیسان بێنه‌ سه‌رمان، ئه‌وکات ئێمه که ته‌قه‌مه‌نیمان پێ نه‌مابوو به‌چی به‌رگریمان بکردایه؟‌ بۆیه‌ ئیمکانی ئه‌وە هه‌بوو که تیابچین، خه‌می شه‌هید بوونی پێنج هاوڕێی ئازیمان و ماندویه‌تی ڕێگا بڕینه‌که‌ی شه‌وی پێشتر و شه‌ری دوێشه‌و تا ئه‌مکاته‌ و برسێیه‌تی و تونیه‌تی و ترس له که‌مین و تێکهه‌ڵچونێکیتر له‌و دۆخه‌دا که‌ فیشه‌کمان پێنه‌مابوو هێزی هه‌مومانی بێهێزتر کردبوو. به‌ ناچار ئه‌و شه‌وە تابه‌یانی به‌ ڕێگاوە بوین و بێوچان رێگامان بڕی و بۆ ئه‌وەی له‌ جادەی دیواندەرە بۆ سه‌قز تێپه‌ڕ ببین، هه‌ر چی رێگا ڕۆیشتنه‌که‌مان خێراتر كردەوەو بێ پشو به‌ردەوام بوین له رێگا بڕین نه‌مانتوانی ئه‌و شوێنه‌ی وا دیاریمان کردبوو بی گه‌ینێ نه‌یشمان توانی له‌جادەی دیواندەرە بۆ سه‌قز بکه‌ینه‌ ئه‌وبه‌ر، له‌ ئاواییه‌کدا ماینه‌وە، نگه‌ران بوین، خه‌می گیانبه‌ختکردنی ئه‌و هاوڕێیانه‌ له‌سه‌ر دڵی هه‌مومان قورسایی ئه‌کرد، زۆر خۆمان ئه‌پاراست و دڵه‌ڕاوکێمان هه‌بو که شه‌ڕێکیتر ببێت به‌توشمانه‌وە، زۆرێک له‌ هاوڕێیان فیشه‌که‌کانیان ته‌واو ببو، ئه‌وانه‌ی که‌ فیشه‌کی پێمابوو له‌ به‌ین هه‌مواندا دابه‌شکران ئه‌توانم بڵێم ئه‌و هێزە زۆرە یه‌کی یه‌ک خه‌شاب(دراغ) فیشه‌کمان به‌رکه‌وت، ئه‌و ڕۆژە له‌و ئه‌اواییه‌دا ماینه‌وە که نازانم چۆن بوو هیچ روی نه‌دا کاتێک شه‌و داهات ئێمه‌یش به‌ڕەو شوێنێتر وەرێکه‌تین.

له‌و شه‌رەدا نزیک به‌٣٠٠که‌س له‌ هێزەکانی رژیم کوژران که زۆربه‌یان جاشه‌کورد بوون و سه‌دان که‌سیشیان لێ بریندار بوو، به‌داخه‌وە له‌و شه‌ڕەدا ٥ پێشمه‌رگه‌ی کۆمه‌ڵه‌، ٥ ئه‌ستێرەی گه‌شاوەی ئاسمانی چه‌وساوەکانی کوردستان گیان و ژیان و خوێنی خۆیان به‌ختی رزگاری هه‌ژاران و چه‌وساوەکانی کوردستان کرد و چونه ریزی گیانبه‌ختکردوانی رێبازی پڕ له‌ شا نازی کۆمه‌ڵه‌ و ڕزگاری گه‌لی چه‌وساوەی کورد. هه‌ر وەها یه‌ک که‌سی خه‌ڵکی ئاوایی که‌وته‌ به‌ر پریشکی گوله ‌تۆپ و گیانیبه‌ختکرد.

ناوی گیانبه‌ختکردوانی کۆمه‌ڵه‌ بریتی بوون له‌:

قادربارامی فه‌رماندەی گوردانی چیا، حبیب‌اڵڵه‌ئه‌مجه‌دیان فه‌رماندەی‌په‌ل، جه‌عفه‌رکه‌مانگه‌ر(جه‌عفه‌رکه‌وانه‌یی)فه‌رماندەی‌دەسته‌، سابرموحه‌مه‌دی(سابرحه‌سار چه‌رموو)، جه‌عفه‌ر کرماشان

2354جار بینراوه‌  ◊ کۆدی هه‌واڵ:1753
Share/Save/Bookmark