0
پەیامى کۆمیتەى ناوەندى کۆمەڵە بە بۆنەى 8ى مارس رۆژی جیهانی ژن
Saturday, 08 March 2014 12:34
پەیامى کۆمیتەى ناوەندى کۆمەڵە بە بۆنەى 8ى مارس رۆژی جیهانی ژن
 
8 ى مارس، وەک رۆژى جیهانى ژنان ناسراوە.لە مێژووى مرۆڤایەتیدا رۆژێکى پیرۆزو پڕ لە دەسکەوت و بیرەوەریە.

رۆژێک کە بۆ یەکەم جار ژنان لە بەرامبەر چەوسانەوەو ناعەداڵەتیەکان، پەراوێز خستن و دوور خستنەوەیان لە کایە سەرەکیەکانى ژیان، رێز نەگرتن لە ئیرادەو تواناکانیان، سود وەرگرتن لە هێزى کارى ئەوان بەرامبەر بە داهاتێکى کەم، بە کارهێنانى ژنان وەکو ئامراز، گوێ نەگرتن لە ویست و داخوازیەکانیان، هاتنە سەر شەقامەکان و خۆپیشاندانیان کردو بۆ یەکەم جار بە دەنگى بەرز داواى مافە زەوتکراوەکانى خۆیان کرد.

 

ئەم رۆژەداسەرەتاى دەستپێکردنى خەباتێکى هەمەلایەن و هاوپێوەندى و هاوسۆزى و بێ وچانى ژنانى جیهانە کە بووە سەرەتایەک کە ژنانیش وەکو نیوەى کۆمەڵ ئەژمار بکرێن و مافى بەشداریان لە پرۆسەى دەنگدان و کاروبارى سیاسى و بەرێوەبردنى کاروبارى دەوڵەت، بەشدارى لە بازاى کارو ئابوورى ، چالاکى فەرهەنگى و رۆشنبیرى و پەروەردەو فێرکردندا هەبێت.

 

هەروەها 8 مارس کە لە لایەن رێکخراوى نەتەوە یەکگرتەوەکانەوە بە رۆژێکى جیهانى ناوزەد کراوە، رێز گرتنە لە هەوڵ و تیکۆشانى هەزاران ژنى خەباتکارى بوارى یەکسانى و ئازادیخوازى کە تا دواین هەناسەى خۆیان تێکۆشاون بۆ هێنانە کایەى کۆمەڵگایەکى ئازاد کە ژنانیش شان بە شانى پیاوان بەشدار بن لە هەموو بوارەکان و یەکسان بن لە مافەکاندا، ئەو ژنانەى کە بە خەبات و هەوڵدانە ماندوونەناسەکانیان تووانیان پرسى ژن بکەنە پرسێکى جیهانى و لە هەموو جیهاندا بزوتنەوەى جۆراوجۆرى ژنان بۆ بە دەست هێنانى مافەکانیان لە ژێر کاریگەرى ئەواندا هاتە کایەوە.

 

کۆمەڵە هەر لە سەرەتاى دامەزراندنیەوە وەکو رەوتێکى نوێ لە گوتارو کردارو رەفتار چ لە رووى سیاسى و کۆمەڵایەتى و فەرهەنگیەوە، گرنگیەکى زۆرى بە مافەکانى ژنان داوەو سەرەراى کۆسپ و تەگەرە، بوونى فەرهەنگى دواکەوتووانەو خێڵەکى، یەکەم حیزبى داهێنەر بووە کە پشتیوانی ئەم بەشە گرنگەى لە کۆمەڵگا کردووە تا لە پرۆسە جۆراوجۆرەکاندا بەشدار بن. کۆمەڵە بۆ یەکەم جار لە مێژووى خەباتی سیاسی و چەکداریدا ژنانى چەکدار کردووەو شان بە شانى پیاوان بۆ بە دەست هێنانى مافەکانیان بە بەربڵاوی تێکڵاوی خەباتێکی سیاسیی و چەکداری کردن. کەم نین ئەو کەڵە ژن و کچانەى کە لە مێژووى ئەم حیزبەدا لە بوارە جۆراوجۆرەکانى سیاسى و نیزامى و فەرهەنگیدا، پێگەیشتن و بە داخەوەش کەم نین ئەوانەى کە لە خەباتى پیشمەرگانەدا بۆ بە دەست هێنانى مافە زەوتکراوەکان لە سەنگەرەکانى بەربەرەکانیدا شەهید بوون.

 

ژنان و پیاوانى بەرابەریخواز

 

ئەم ساڵیش لە کاتیکدا ئێمە رێز لەو رۆژە جیهانى و مێژوویە دەگرین کە هێشتا لە ئێرانی ژێر دەسەڵاتى رەشى کۆمارى ئیسلامیدا ژنان بە هۆی ئەو دەسەڵاتەوە کە لە گەڵ هەموو پرینسیپە نێونەتەوەیى و بنەما سەرەکیەکانى دێمۆکرسى و مافى مرۆڤ دژە، لە هەموو بەها ئینسانیەکان بێبەشن. ئەم دەسەڵاتە، بە یاساى جۆراوجۆرى دواکەوتووانە، کۆمەڵگاى ئێرانى بەرەو گەورەترین داخران لە هەموو بوارەکان بردووە و لەم نێوەندەشدا ژنان بە حوکمى یاساى تایبەتتر، فەرهەنگى پیاوسالاری و خێڵەکى، ئایین و مەزهەب، کۆت و بەند کراون و لە زۆرێک لە مافە سەرەتایى و ئینسانیەکانیان بێبەشن و بە بیانووى جۆراوجۆر لە بوارە جۆراوجۆرەکانی ژیاندا بەشداریان پێناکرێ و بە بیانووى پاراستنى شەرەف و بە حوکمى باوەڕی دواکەوتووانە تووندوتیژیان بەرامبەر دەکرێ و دەکوژرێن.

 

ئەگەر چاوێک بە بارودۆخى ژنان بخشێنین لە سایەى ئەم دەسەڵاتە لە ئێراندا، بە هۆى نەبوونى دەرفەتى کارو یاساى پشتیوانى لە ژنان، راپۆرتە ناوخۆیى و نێو نەتەوەیەکان شاهیدى ئەوە دەدەن کە ژنان چۆن لە بوارى رەگەزیەوە مامەڵەیان لە گەڵدا دەکرێت و رێژەى لەشفرۆشى و بازرگانى بە ژنان و کچان گەشتۆتە چ ئاستێک. ژنان و کچان دەستدرێژیان دەکرێتە سەرو لە هەمان کاتدا بە پێى یاساکان سوکایەتیان پێدەکرێ و بە درندانەترین شێوە حوکمی نا مرۆڤانەیان بە سەردا دەسەپێنن. ئەمەش لە کاتێکدایە تەواوى ئەو راپۆرت و هاوارە نێو نەتەوەییانەى کە دژ بە ئێران لەو بوارانەوە بەلاۆ بووەتەوە نەیتوانیوە کارێگەرى لە سەر هەموار کردن، یان گۆرینى یاساو عورفەکانى ئەم دەسەڵاتە دژە ژنە دابنێت.

 

رێکەوتنامەى سیداو کە تایبەتە بە مەسەلەى دادوەرى لە بەرامبەر هەڵاواردنى مافەکانى ژناندا، ئەو رێکەوتنامە نێونەتەوەییەیە کە لە لایەن کۆمەڵەى گشتى نەتەوە یەکگرتووەکانەوە دواى چەندین دانوستان و پرس و راوێژو لە ساڵى 1979 بەڵاوبووەتەوە . دواى پەسەند کردنى کەوتە بوارى جێبەجێکردنەوە .ئەو وڵاتانەى کە ئیمزایان لە سەر ئەم رێکەتنامە کردووە دەبێـت ناوەرۆکى ئەم رێکەوتنامە جێبەجێبکەن و یاساو رێساکانى خۆیان ئەگەر لە گەڵ بنەماکانى ئەم رێکەوتنامەدا نەهاتەوە، یان هەموارى بکەنەوە یان بیگۆرن بە جۆرێک کە لە گەڵ بەندەکانى ئەم رێکەوتنامەدا بگونجێ. بە بەڵگەنامەیەکى گرنکى نێونەتەوەیى بۆ مافەکانى ژنان دەناسرێت .

 

ئەگەر چى هەندێک لە وڵاتان بە تێبینیەوە ئیمزایان لە سەر ئەم رێکەوتنامەیە کردووە بەڵام ئێران لە ریزى ئەو شەش وڵاتەى وەکو سۆماڵ و سودان..... و کە ئەم رێکەوتنامەیان ئێمزا نەکردووە و بەمەش ئێران ناچێتە ژێر بارى هیچ پەیماننامەو رێکەوتنامەیەکى نێونەتەوەیى سەبارەت بە مافەکانى ژنان و بەشدار نابێت لەو خەباتە هەمە لایەنە کە بۆ پشتیوانى لەم پرسە جیهانیە هەیە.

 

هەر بەم بۆنە مێژوویەوە ئەگەر ئاورێک لە سەر بارودۆخى ژنانى کورد بە گشتى و ژنانى کوردستانى رۆژهەڵات بدەینەوە، دەبینین سەرەراى کۆسپ و تەگەرەو سونەتو داب و نەریتە دواکەوتووەکان کە بوونەتە مایەى توندوتیژى و هەڵاواردن و دوور خستنەوەو دەرفەتى زیاترى گەشەى ژنان، بەڵام لە لایەکى دیکەوە فشارى دەوڵەتانى دەسەڵاتدار بە سەر کوردستانەوە یەکێکى تر لەو ستەم و چەوسانەوانە بووە کە ژنانى کوردى کردۆتە قوربانى و لە بوارەکانى بەرێوەبردن و بەشدارى لە پرۆسە جۆراوجۆرەکاندا دوورى خستوونەتەوە. بەڵام ئەمانە قەد نەیانتوانیوە بەر بە دەنگ و هاوارى پر لە داواکارى و دلێرانەى ژنانی تێکۆشەر بگرن. لە کوردستان ژنان و بزوتنەوەکەیان هاوشانی پیاوانى ئازادیخوازو پێشکەوتووخواز لە بەربەرەکانى لە گەڵ عورف و سونەت و یاسا دواکەوتووەکان بۆ هێنانە کایەى کۆمەڵگایەکى پر لە دادپەروەرى و یەکسانیخواز، بۆ بە دەسهێنانی مافە سیاسی، ئابوری و کۆمەڵایەتیەکانی خۆیان و نەهیشتنی ستەمی نەتەوەیی خەباتیان کردوەو دەیکەن.

 

ژنانى تێکۆشەرى کورددستان

 

کۆمەڵە وەکو حیزبێکى داکۆکیکار هەمیشە پشتیوانی لە مافەکانى ئێوەو بزوتنەوە رەواکەتان دەکاو لە بەرنامەى سیاسى و کۆمەڵایەتى و فەرهەنگى خۆى بۆ داهاتووى وڵاتەکەمان دژى هەر هەڵاواردنێکى رەگەزى و بیمافى ئێوە وەستاوەتەوەو دەوەستێ . بەشدارى کردنى چڕو پڕى ژنان لە ئیدارە کردنى وڵات و پرۆسەى سیاسى ، ئابووى و بازارى کار، بوارە رۆشنبیرى و فەرهەنگیەکان بە گرەنتى بۆ دێمۆکراسى و پەیرەو کردنى جارنامەکانى مافى مرۆڤ و دەسەڵاتێکى دادپەروەرانە دەزانێت و خۆى بە بەرگریکارى شێلگیر بۆ هاتنە کایەى دەسەڵاتێکى پێشکەوتووخوازو کە ژنان تێیدا ئاسودە بن لە قەلەم دەدا.

 

لەم رۆژە جیهانیەدا دەبێت یادێکیش لەو دایکانە بکەینەوە کە باشترین رۆڵەکانى خۆیان پێشکەش بە کاروانى پر سەروەرى شەهیدانى بزوتنەوەى کوردستان کرد. ئەوان لە داهاتووى رزگارى وڵاتەکەماندا وەکو رەمزو هێما دەبێت رێزیان لێ بگیرێت. یادى ئەو ژنان و کچانە بکەینەوە کە لە ریزى پێشمەرگایەتیدا چەکى بەرگرى و خۆراگریان لە شان کردو شەهید بوون، یان باشترین رۆژەکانى ژیانى خۆیان پێشکەش بەم رێبازە پیرۆزە کرد. سڵاو دەنێرین بۆ ژنانى خەباتکارى ژێر دەسەڵاتى دژە ژنى کۆمارى ئیسلامى یا لە زیندانەکاندان یا لە مەیدانەکانى ترى خەباتدا بەرگرى لە ماف و ئازادییەکانى خۆیان و هاورەگەزەکانیان دەکەن. سڵاویش لە ئێوە ئەى ژنانى تێکۆشەرى نێو ریزەکانى کۆمەڵە کە بە فیداکاریەکانتان لەم بزوتنەوە روسوورەدا بەشدارن .

 

جارێکى تر 8 مارس لە هەمووان پیرۆز

سەرکەوێ خەباتى رەواى ژنان بۆ هێنانە کایەى کۆمەڵگایەکى پر لە یەکسانى و بەختەوەرى

کۆمیتەى ناوەندى کۆمەڵەى شۆرشگێرى زەحمەتکێشانى کوردستانى ئێران

7 مارس 2014

 

 

‌ • نوسه‌ر:کۆمەڵەی شۆڕشگێڕی زەحمەتکێشانی کوردستانی ئێران
1469جار بینراوه‌  ◊ کۆدی هه‌واڵ:1878
Share/Save/Bookmark