0
بەڕێوە چوونی رێوڕەسمی ساڵوەگەڕی 26ی رێبەندان لە بارەگای ناوەندی کۆمەڵە + وێنە
Monday, 17 February 2014 12:12
بەڕێوە چوونی رێوڕەسمی ساڵوەگەڕی 26ی رێبەندان لە بارەگای ناوەندی کۆمەڵە + وێنە
 
لە بارەگای ناوەندی کۆمەڵەی شۆڕشگێڕی زەحمەتکێشانی کوردستانی ئێران ڕێوڕەسمێک بە بۆنەی ساڵیادی 26ی رێبەندان رۆژی کۆمەڵە بەڕێوەچوو  

 

ئاسۆی رۆژهەڵات: ئەمڕۆ شەممە 26ی رێبەندانی ساڵی 1392ی هەتاوی رێوڕەسمێکی شکۆدار بە بۆنەی 35 ەمین ساڵیادی ئاشکرابوونی هەڵسووڕانی کۆمەڵە لە بارەگای ناوەندی کۆمەڵەی شۆڕشگێڕی زەحمەتکێشانی کوردستانی ئێران، بە بەشداری رێکخراوە و پارت و لایەنە سیاسییەکانی باشوور و رۆژهەڵاتی کوردستان بەڕێوە چوو.

 

سەرەتای رێوڕەسمەکە بە سروودی بانگەواز سروودی رەسمی کۆمەڵە و چەند ساتێک بێدەنگی بۆ رێزگرتن لە گیانبەختکردووانی کۆمەڵە و سەرجەم گیانبەختکردووانی بزووتنەوەی رزگاریخوازی کوردستان دەستی پێکرد.

 

دواتر پەیامی کومیتەی ناوەندی کۆمەڵەی شۆڕشگێڕی زەحمەتکێشانی کوردستانی ئێران لە لایەن هاوڕێ عەبدوڵڵا موهتەدی سکرتێری گشتی پێشکەش بە بەشدار بووان کرا.

 

ژمارەیەکی زۆر لە رێکخراوە و لایەن و کەسایەتییە سیاسییەکانی کورد پەیامی پیرۆزباییان بەو بۆنەوە ناردبوو کە لە لایەن هاوڕێ کانی شایەقی یەکێک لە بەڕێوەبەرانی رێوڕەسمەکە بە بۆنەی کەمی کات تەنیا ئاماژە بە ناوەکانیان کرا.

 

لەدرێژەی رێوڕەسمەکەدا هاوڕێ موختار ئەحمەدی یەکێکی دیکە لە بەرێوەبەرانی رێوڕەسمەکە پەیامی تەشکیلاتی زاگرۆسی بە بۆنەی هاتنی 26ی رێبەندان رۆژی کۆمەڵە خوێندەوە و پاشان بەهۆی ئەم رۆژەوە ژمارەیەک پەیام لە کۆمیتەکانی تەشکیلاتی نهێنی زاگرۆسەوە بەدەست بەرێوەبەرانی رێوڕەسمەکە گەیشتبوو کە بەهۆی کەمی کات تەنیا ئاماژە بە ناوەکانیان کرا.

 

لەدرێژەی رێوڕەسمەکەدا کۆڕی سروودی لاوانی رۆژهەڵات سروودێکیان پێشکەش بە ئامادەبووان کرد.

 

لەو رێوڕەسمەدا هونەرمەند "لوقمان سەلیم" سروودی ئەی شەهیدان و چەند سروود و گۆرانی نیشتمانی دیکەی پێشکەش بە بەشدار بوان کرد.

 

لە ناوەبەناوەی رێوڕەسمەکە پاشکۆی رۆژنامەی ئاسۆی رۆژهەڵات کە تایبەت بە رۆژی کۆمەڵە بوو و کتێبەکانی بەرنامە و ئەساسنامە و بڕیار و بەڵگەنامەکانی کۆنگرەی 14ی کۆمەڵە و ئەقایدی ئینقلابی مارکس لە وەرگێڕاوەکانی هاوڕێ فاروق بابامیری ئەندامی دەفتەری سیاسی کۆمەڵە لە نێوان ئامادە بووانی رێوڕەسمەکە بڵاو کرایەوە.

 

هەروەها پەیامی سێ رێکخراوی کۆمەڵەی ژنانی رۆژهەڵات، کۆمەڵەی لاوانی رۆژهەڵات و کۆمەڵەی خوێندکارانی رۆژهەڵات لە لایەن هاوڕێ سەرگوڵ خودایار خوێنرایەوە.

 

لەدرێژەی رێوڕەسمەکە هاوڕێ عەبدوڵڵا سکرتێری گشتی کۆمەڵە نمامێکی بە بۆنەی رێزلێنان لە 26 رێبەندان چاند و ئەم کارە لەلایەن هاوڕێیانی کۆمەڵەی ژینگەی سەوزی رۆژهەڵات پێشووتر ئامادە کرابوو.

 

لەدرێژەی بەشی یەکی رێوڕەسمەکە چەند تابلۆیەکی هەڵپەڕکێ لە لایەن کۆڕی هەڵپەڕکێ لاوانی رۆژهەڵات پێشکەش بە بەشدار بووان کرا. بە کۆتایی هاتنی ئەم برگە لە رێوڕەسمەکە بەشی یەکەمی رێوڕەسمەکە کۆتایی پێهات. بەشی دووهەمی رێوڕەسمەکەش تەرخان کرابوو بۆ هەڵپەڕکێ کە لەناو خۆشی ء شادی بەشدار بوواندا کۆتایی پێهات.

‌ • نوسه‌ر:ئاسۆی رۆژهەڵات
1806جار بینراوه‌  ◊ کۆدی هه‌واڵ:1857
Share/Save/Bookmark