0
هێلانەی سی و شەش هەڵۆی سوور
Tuesday, 11 February 2014 09:39
هێلانەی سی و شەش هەڵۆی سوور
 
هێلانەی سی و شەش هەڵۆی سوور  

ئەمڕۆ نەهاتمە تەنگیسەر

 

هیچ ساتێک و هیچ ساڵێکی دیکەش نایەم!

 

ئەگەر من بێم، دەبێ دڵم لە سوچێکی ژوورەکەمدا

 

جێ بێڵم و "تەنگیسەر"یش تەنیا و تەنیا،

 

بە بێ هاوەدەم و

 

هاوڕازێک لێم زویر بێت!

 

نا.. ئەو نەیهێشت.. ئەو پێی وتم:

 

مێژوویەکە جگە ئا لەو تەنگیسەرەی لە ناختدا

 

دارهەناری هەردەم سەوز و گوڵگرتووە و

 

ئارام ئارام، گۆرانی بۆ ژیان دەڵێ،

 

لە ئاسۆوە، لەگەڵ گزنگی بەیاندا،

 

هەموو ڕۆژێک، سی و شەش هەڵۆی

 

باڵخوێناویی لێ هەڵدەفڕێ و

 

پۆلەهەڵۆ بە ئاسمانی شاری "شێخ"دا

 

گڕ دەخۆن و لە ڕووخساری خۆلەمێشیی

 

شەقامەکان، لە ئەپارتمانی بێگیان،

 

لە پەشیمانیی "گرد"ەکان ڕادەمێنن.

 

سی و شەش هەڵۆی بەژنکورت و

 

بەرزەبیر و

 

باڵیان هێندەی خەم و ئازار و مەینەتیی

 

ڕەشوڕووتی ئەم وڵاتە درێژ، ڕەنگە دریژتر بن.

 

سی و شەش هەڵۆ، هەژدەیان ناویان (ئارام)ەو

 

هەژدەکەی دیش هەر (شاسوار)ن!

 

ئەو خۆی وتی. تەنگیسەر خۆی:

 

(خەڵکی تەنیا ساڵی جارێک دێنە زیارەتی مەزارم.

 

مەزاری من سی و شەش ساڵە، لە ڕووحتدا،

 

هەم مەزرایەکی بەبژوێن، هەم ئارامگەی هەڵۆیەکە،

 

ئاشنایەتیی

 

لەگەڵ پیری و مەرگ نییە!)

 

 

 

پشکۆنەجمەدین

 

 

 

31ی یەنیوەریی 2014

 

‌ • نوسه‌ر:پشکۆنەجمەدین
1887جار بینراوه‌  ◊ کۆدی هه‌واڵ:1838
Share/Save/Bookmark

زۆربینراوترین سه‌ردێڕی هونه‌ر و که‌لتور‌